நினைப்புகள் தவறானவை

சமுதாயத்தில் தற்புகழ்ச்சியும்,முகமன்களும் இன்று தாராளமாகப் பரவிவருகின்றன.

தன்னைத் தானே புகழ்வது தற்புகழ்ச்சியாகும். மற்றவர்கள் தன்னை மதிக்க வேண்டும். இது தற்காலிக மக்ழ்ச்சியே.

மற்றவர்களிடம் நன்மதிப்பைப் பெற வேண்டும் என்ற எண்ணம் தவறு என்று சொல்ல மாட்டேன்.

ஆனால் பெறும் நன்மதிப்பு எவ்வாறு வருகிறது என்பது தான் முக்கியம். தன் காரியம் வெற்றி பெற வேண்டும் என்ற சுயநலத்தால் மற்றவரை வானளாவப் புகழ்வதற்குப் பெயரே முகமன்.

இதற்கு வசப்படாதவர்கள் சிலரே. மற்றவரின் முகமன் நம்மைப் பயன்படுத்த விழையும் சாதுரியமே என்பதை அறிந்தவர்களிடம் ஒன்றும் நடக்காது.

தற்புகழ்ச்சி தற்காலிகமானது என்றால் முகமன் அதை விட கீழானது என்பதை அறிந்தவர்கள் நிறைய உண்டு.

சூழ்நிலைகளை அறிந்து பேசாது இருந்து விடுவதை தப்புக் கணக்கில் சேர்ப்பவர்கள் பலர் உண்டு.

இரண்டுமே சுயநலத்தின் பெற்றோர்களே.

இன்றைய அரசியலில் , இவைகள் பல்கிப் பெருகி ஆல் போல் தழைத்து வருவதை நாம் அறிவோம்.

போலியான ஆர்ப்பாட்டங்கள், பலன் கருதி செய்யப்படும் உதவிகள் நடவடிக்கைகள் மூலம் அப்பட்டமாகத் தெரிந்து விடும்.

அலுவலங்கள், நிறுவனங்களில் இவைகளின் ஆதிக்கம் அதிகம் இருந்தாலும் , வெளிச்சத்துக்குக் கொணரும் போது வெறுமையாகக் காட்சி தரும்.

அந்தரங்கச் சுத்தியுடன் நமக்கு மட்டுமன்றி, மற்றவர்களுக்கும் காரியத்தை முடிந்த வரை செய்து கொடுத்தாலே போதும் நம் மதிப்புகள் உயர்ந்து விடும்.

குருஷேத்திரப் போரில் அர்ச்சுனனுக்கு கண்ணன் ' பலனை எதிர்பாராமல் கடமையைச் செய்' என்று உபதேசம் செய்தார் என்பதையும் இவ்வேளையில் நினைத்தாலே போதும் தெளிவு பிறந்துவிடும்.

குரு ராதாகிருஷ்ணன்

எதிலும் அக்கறை தேவை

எடுத்துக் கொள்ளும் விஷயங்களில் அக்கறை செலுத்துபவர்கள் குறைவு.

விஷயங்கள் எத்தன்மை கொண்டதாக இருப்பினும் கரிசனத்தோடு செயல்பட்டால் தான் விரைவில் பலன் பெற முடியும்.

ஆரம்பம், ஆக்கம், முடிவு, அதனால் விளையும் நன்மை, என்னும் நான்கு பிரிவுகளைக் கொண்டது தான் காரியம்.

என் நண்பர் தொலைத் தொடர்புத் துறையில் பணியாற்றி வந்தார். எனக்காக எதுவும் செய்யக் கூடியவர்.

 என் வீட்டுக்குத் தொலைபேசி வைத்துக் கொள்ளுமாறு அடிக்கடி வலியுறுத்தி வந்தார். கொஞ்ச நாள் போகட்டும் என்று தள்ளிப் போட்டுக் கொண்டே வந்தேன்.

அடுத்த வீட்டு நண்பர் தொலைபேசி இணைப்பைப் பெற வேண்டி என்னைச் சந்தித்தார்.

விண்ணப்பமும் வாங்கி வந்திருந்தார். விண்ணப்பத்தைப் பூர்த்தி செய்ய உதவி செய்தேன். தொலைத் தொடர்புத் துறை நண்பரைப் பற்றிச் சொல்லி அனுப்பினேன்.

அறுபது நாளில் வைப்புத் தொகையைச் செலுத்தச் சொல்லி தகவல் வந்தது. பணம் செலுத்திய பின் என்னிடம் தெரிவித்தார்.

பொதுவாகத் தொலைத் தொடர்புத் துறையில் பொதுத் திட்டத்தின் கீழ் பதிவு செய்தால் வருடக் கணக்கில் காத்திருக்க வேண்டும்.

விண்ணப்பங்கள் வரிசைக் கிரமமாகத் தான் இணைப்புக்கான நடவடிக்கைள் எடுக்கப்பட வேண்டுமென்பது சட்டம். வருடம் ஒன்று சென்றது. அடுத்த வீட்டில் இருக்கும் நண்பர் தான். இதைப் பற்றி என்னிடம் எதுவுமே சொல்லவில்லை. விண்ணப்பம் செய்யும் போது இருந்த அக்கறை போகப் போக இல்லை.

திடீரென ஒருநாள் என்னிடம் விவரம் சொன்னார்.

அவரை அழைத்துக் கொண்டு அலுவலகத்துக்குச் சென்றேன். நண்பரைச் சந்தித்தேன். விவரங்களைக் கூறினேன். பதிவேடுகளைப் பார்த்தார். வைப்புத் தொகை செலுத்தப்பட்ட சீட்டையும் பார்த்தார்.

என்னை தனியே அழைத்துச் சென்று பேசினார். அடுத்த வீட்டு நண்பரின் விண்ணப்பத்துப் பதிவு எண் ஏனோ தரப்படவில்லை. அந்த பிரிவு எழுத்தர் நீண்ட விடுப்பில் சென்று விட்டதாகவும், புதிதாக நியமிக்கப்பட்டவர் வேலைக்குப் புதியவராதலால் தவறு நிகழ்ந்து விட்டது என்றார்.

ஆவணங்களைக் கோப்பில் புரட்டிப் பார்த்து பின் பதிவேட்டில் இடையில் செருகிப் பதிவு செய்து புதிய எண் கொடுக்காமல், ஏதோ எழுதி சரி செய்தார்.

ஆறு மாத காலத்தில் அடுத்த வீட்டு நண்பருக்குத் தொலைபேசி இணைப்பு கிடைத்தது.

அவரது அக்கறை இன்மையே இவ்வளவு சங்கடங்களும் ஏற்படக் காரணமாயிற்று.

அலுவலகத்தில் எனக்கு வேண்டிய நண்பர் இருந்ததால் விஷயம் சுலபமாக முடிந்தது. இல்லையெனில் விஷயம் என்னவாகி இருக்கும் ? கற்பனை செய்து பாருங்கள்.

எடுத்துக் கொண்ட விஷயங்களில் அக்கரை செலுத்தாதவர்கள் விரைவில் பலனைப் பெற முடியாது.

குரு ராதாகிருஷ்ணன்

பிறரை நம்புவதில் கவனம்

சாதுரியப் பேச்சையும் , தோற்றத்தையும் வைத்து முன்பின் தெரியாதவர்களை நம்ப வேண்டாம்.

தோற்றத்தினால் பெரிய மனிதராகவும், பேச்சால் செல்வாக்கு மிக்கவராகவும் தெரிவதைக் கண்டு உணர வேண்டும்.

போன வாரம் என்னைத் தேடி ஒரு பையன் வந்தான். தமிழ்நாடு பணியாளர் தேர்வாணையத்திலிருந்து வந்திருந்த நேர்காணல் கடிதத்தையும் கொடுத்தான். சென்னைக்கு அவனுடன் சென்று காரியத்தைக் கச்சிதமாக முடித்துத் தந்தேன். பணம் அதிகம் செலவாகவில்லை. ஏதோ என்னால் ஆன உதவி என்று ஒருவர் சொன்னார்.

அந்தப் பையனைச் சந்திக்க முடிந்து சென்னைப் பயணம் குறித்துக் கேட்டால் தான் தெரியும் . பணம் தண்ணீர் போல் செலவழித்தும் காரியம் இனிமேல் தான் தெரியவரும் என்ற செய்தி கேட்கலாம்.

இத்தகைய நிகழ்வு நிறையப் பாடங்களைக் கற்றுத் தருகின்றன.

புதியவரிகளிடம் பழகுவதில் நிதானமும், கவனமும் தேவை.

அறிந்த நபர்களைப் பற்றிக் குறைவாகத் தெரிந்திருந்தாலும் கவனமாக இருக்க வேண்டும் .

மிகவும் தெரிந்து கொண்டுள்ள நபர்களிடம் பொறுப்புக்களை நம்பி ஒப்படைக்கலாம். தெரிந்த நபர் வேறு ஒருவரை வைத்து காரியத்தை முடிக்கலாம். அவரைச் சந்திப்போம் என்று ஆலோசனை கூறும் போது கவனமாகச் செயல்பட வேண்டும்.

நமக்கு வேண்டியவர்களிடம் காரியங்களை ஒப்படைத்தால் மட்டும் போதாது.

அவரை நினைவூட்டிக் கொண்டே இருக்க வேண்டும்.

நண்பர் தானே, நன்றாகத் தெரிந்தவர் தானே என எண்ணி விஷயத்தை ஆறப் போட்டு விடலாம். கால தாமதத்தால் காரியங்கள் முடியாமலேயே போய்விடும் வாய்ப்புகள் உண்டு.

வேண்டியவர்களிடம் அடிக்கடி சென்று நினைவூட்டினால் , நச்சரிக்கிறாரே என்று எரிச்சல் உண்டாகும் என்று நினைக்கிறீர்கள்.

காரியம் முடியும் வரை, சந்தித்து நினைவூட்டி சாதித்துக் கொள்வதில் தான், திறமையானவர் என்ற பெயரை அடைய முடியும்.

நம்பிக்கை சில நேரங்களில் தான் பயன்படும். பல நேரங்களில் விடாமுயற்சிகள் தான் வெற்றியைத் தருகின்றன .

குரு ராதாகிருஷ்ணன்

ஆக்குக .. ஆக்குக .. !

மனிதவளம் நிறைந்திருக்கும் வளரும் நாடுகளில் இந்தியா இரண்டாவதாக இருக்கிறது . முதலிடத்தில் சீன தேசம் . ஒட்டுமொத்த மொத்த மக்கள் தொகையில் 45 விழுக்காடு இளைஞர்களைக் கொண்டது என புள்ளி விபரங்கள் கூறுகின்றன.

எதிர்கால வல்லரசாக இந்தியா திகழ இளைஞர்களின் பங்கு மிக மிக அவசியம். பொருளாதார வல்லுநர்கள் கூறுகின்ற கருத்து இது. நிதர்சனமும் அதுவே.
இளைஞர்கள் சமுதாயத்தில் பங்குபெறுவதற்கான முனைப்பும் , கல்வி முன்னேற்றமும் உடனடித் தேவைகளாகும் . மட்டுமல்ல நாட்டுக்கு உழைத்தல் என்பதுவும் தலையான கொள்கையென அவர்கள் வரித்துக் கொள்ள வேண்டும் .

நாடு முழுவதும் சுற்றுப்பயணம் செய்து இளைஞர்களிடம் பொழிவுகளை நிகழ்த்திய அமரர்.நாரேந்திரநாத் தத் அவர்களைப் பற்றியதே இக்கட்டுரை.

கொல்கத்தா நகரில் 12-01-1863 இல் பிறந்த நரேந்திரர் ஆரம்பத்தில் வீரேசுவரர் என அழைக்கப் பெற்றார். பின்னாளில் இராமகிருஷ்ண பரமஹம்சரால் துறவிப் பட்டம் அளிக்கப்பட சுவாமி விவேகானந்தர் ஆனார்.

இவர் இளங்கலை பட்டம் பெற்றவர். இவருக்கு வங்காளம்,இந்தி, சமக்கிருதம்,ஆங்கிலம், பிரெஞ்சு மொழிகள் தெரியும். இந்தி, சமக்கிருத மொழிகளின் வேதாந்த கவிதைகளை மொழியாக்கமும் செய்தவர்.

இந்தியா முழுவதுமாக பயணம் செய்தவர். திருமணமே செய்து கொள்ளாது பிரம்மச்சாரியாகவே இறுதிவரை இருந்து வந்தவர்.

தெய்வீக ஒழுக்கத்தையும், தன்னை அறிதலையும் போகுமிடங்களில் உள்ளவர்களுக்குச் செய்தியாக அறிவித்தார்.

அமெரிக்க நாட்டின் சிகாகோ நகரில் நடைபெற்ற சர்வசமய மகாநாட்டில் கலந்து கொண்டார். இவர் கப்பல் பயணம் மேற்கொள்ளவும், இந்து மதத்தின் தாத்பரியங்களையும் சொல்ல உதவியவர் இராமநாதபுரம் மன்னர் பாஸகர சேதுபதி ஆவார்.

அமெரிக்காவில் சுற்றுப்பயணம் மேற்கொண்டார். நான்கு வருடங்கள் வாசத்துக்குப் பிறகு கப்பலில் இந்தியாவிற்கு வந்தார். ' புரூக்கிளீன் நைட்டிக் சபா ', 'வேதாந்த சொஸைட்டி' என இரு அமைப்புகளை அமெரிக்க வாசத்தின் போது நிறுவினார்.

இந்தியாவில் இவர் இறங்கிய இடம் பாம்பன். கொல்கத்தாவில் பேலூர் என்னுமிடத்தில் ராமகிருஷ்ணா மிஷன் மடத்தினை 1897 இல் நிறுவினார்.

விவேகாநந்தர் 04-07- 1902 அன்று இயற்கை எய்தினார்.இவர் வாழ்ந்தது 39 ஆண்டுகளே. ஒழுக்கமான வாழ்க்கையையும், பிரம்மச்சரியத்தையும் கடைபிடிக்க இவரது கருத்துக்கள் இந்திய மக்களிடம் பெரும் வரவேற்பைப் பெற்றன.

பல்வேறு உபயோகமற்ற வழிகளில் இளைஞர்கள் தங்களை ஈடுபடுத்திக் கொள்வதை கவனித்த விவேகாநந்தர் தனது பொழிவுகளில் இவர்களுக்கு தேவைப்படும் கருத்துக்களை சொல்வதில் முனைப்புடன் செயல்பட்டார்.

விழுமின் ; எழுமின் ; கருதிய காரியம் கைகூடும்

வரை தயங்காது செயல்படு மின்

பலமே வாழ்வு ; பலமில்லையேல் மரணம்.

பிறருக்கென்றே உழைப்பவர்களே வாழ்பவர்கள் ;

மற்றவர்கள் நடைபிணத்திற்குச் சமம்.

துணிவுடைய இளைஞர்களே ! நீங்கள் அனைவரும் பெரும் பணியைச் செய்ய பிறந்தவர்கள் என்பதில் முழு நம்பிக்கை கொள்ளுங்கள். அஞ்சாமல் எதிர்நின்று அரும்பணி செய்யுங்கள்.

துணியுங்கள். மனிதன் சாவது ஒருமுறையே. என் சீடர்களாக இருப்பவர்கள் கோழைகளாக இருக்கக்கூடாது . நான் கோழைத்தனத்தை மிகவும் வெறுக்கின்றேன்.

குழந்தைப் பருவம் முதலே ஊக்த்தையும், ஆக்கத்தையும், பலத்தையும் , பண்பையும் சுரப்பிக்கும் எண்ணம் உங்கள் மூளைக்குள் புகட்டும் . ஏனென்றால் அவையே துன்பத்தைத் துரத்தி, இன்பத்தைக் கொட்டுவன.

சுயநலம் உள்ளவன் செத்துக் கொண்டிருப்பவனாவான்.

நாட்டின் பிறகால நம்பிக்கைகள் உங்களையே பொருத்துள்ளன.

வாழ்க்கையில் ஒரு அரிய பெரிய சீரிய குறிக்கோளைக் கொண்டு அதனால் இறப்பது நல்லது .

முயற்சியில் ஈடுபடு; ஏராளமான ஆற்றல் தானாக வரும்.

நீங்கள் பிறருக்காக செய்யும் மிகச் சிறிய முயற்சிகளும் உங்களுக்குள் இருக்கும் ஒரு ஆக்க சக்தியை எழுப்புகின்றன.

உயிரையும், உடலையும், அறிவையும், மனதையும் பலவீனமாக்கும் எதையும் நஞ்சு என்று ஒதுக்கிவிடு.

ஒவ்வொருவரையும் உன்னையே போல் நேசிக்க முயற்சி செய்.

நீங்கள் உங்கள் இயல்பை மட்டும் உணர்ந்துவிட்டீர்கள் என்றால் தெய்வத் தன்மையை பெற்றவர்களாவது நிச்சயம்.

இவ்வாழ்வு எத்தனை நாள் ? இவ்வுலகில் பிறப்பால் வந்துவிட்டீர்கள். அதற்கு அறிகுறியாக ஏதாவது செய்துவிட்டுச் செல்லுங்கள். அவ்வாறு செய்யாவிடில் உங்களுக்கும் , மரங்கள் போன்றவற்றிற்கும் என்ன வேறுபாடு ? தோன்றுவதிலும், பின் அழிவதிலும் என்ன தனித்தன்மை.

யாருடைய நம்பிக்கையையும் குலைக்க முயற்சிக்காதே. உள்ளதை அழிக்காதே. முடியுமானால் மேலான ஒன்றைக் கொடு.

ஆக்குக ... ஆக்குக ... இதுவே நமது லட்சியமாகட்டும் ..””

மேலே குறிப்பிடப்பட்ட 17 வகைச் சொற்கள் விவேகாநந்தர் ஆற்றிய பொழிவுகளில் கூறியவை தான்.

இவைகளைப் படிக்கும் போது பகவத்கீதை, வில்லியம், திருக்குறள் கருத்துக்கள் மனதில் தோன்றச் செய்கிறது. இம்மூன்றையும் படித்து உணர்ந்தவர்களினால் தான் இம்முடிவுக்கு வர இயலும்.

12-01-2012 அன்று விவேகாநந்தரின் 150-வது பிறந்தநாள் விழா நாடு முழுவதிலும் நிறுவப்பட்ட ' விவேகாநந்தா கேந்திரம்' அமைப்பில் கொண்டாடுவர்.

நாமும் இப்புனித நாளில் லட்சியத்தை நோக்கிச் செல்ல, வழிகாட்டிய அவரை நினைவு கூறுவோம்.

 குரு ராதாகிருஷ்ணன்

 நன்றி : சிகரம் - தன்முனைப்பு காலாண்டிதழ் - ஜனவரி - மார்ச் 2011

சோம்பல் வேண்டாம்

இருபத்தி ஒன்றாவது நூற்றாண்டை நோக்கிச் செல்கிற நாம் கவனத்தில் கொள்ள வேண்டியது அதிகம்.

தாத்தா கால உலகம் வேறு ; நம் பேரப் பிள்ளைகளின் உலகம் வேறு. இரண்டுக்கும் வேறுபாடுகள் நிறைய இருக்கின்றன.

உலக நாடுகளின் நடப்புகளை நம் வீட்டு வரவேற்பறையின் சின்னத்திரைப் பெட்டியில் கண்டு களிக்கிறோம்.

இன்றைய இளைஞர்களுக்கு முக்கிய கடமைகள் நிறைய இருக்கின்றன.

தங்களின் கடமைகளைச் சரிவரச் செய்து முடிக்க முயல வேண்டும்.

படிக்கும் இளைஞர்கள் புத்தகங்களை வெறுமனே புரட்டிப் பார்க்கும் நுனிப்புல் மேயும் நிலை வளரக் கூடாது.

படித்து முடித்து விட்டதாகப் பாவனை செய்தல் அறவே ஒழிக்க வேண்டும்.

கவனத்துடன் பாடங்களில் மன்மொன்றிப் படிக்க வேண்டும்.

தினமும் முடிந்த பாடங்களைத் தவறாது வீட்டில் படித்து முடித்தாலே போதும்.

தேர்வு சமயங்களில் இரவு முழுதும் கண் விழித்துப் படிக்கும் நிலை வராது.

சோம்பல் இல்லாது, மனதில் தங்கும் வகையில் பாடங்களைப் படிக்க வேண்டும்.

படித்து முடித்து விட்டதாகப் பாவனை செய்யும் மாணவன் தன்னையே ஏமாற்றுவான்.

தாம்பரத்திலிருக்கும் ஒருவர் அம்பத்தூரிலுள்ள நண்பரைப் பார்த்தபின் தலைமைச் செயலகம் செல்ல வேண்டிய கட்டாயம்.

அலாரம் வைத்து விட்டுப் படுத்தார். காலையில் அலாரல் அடித்தது. கடிகாரத்தின் தலையில் கைவைத்து அலறலை நிறுத்தினார். மீண்டும் படுக்கையில் படுத்து விட்டார். நாளை பார்த்துக் கொள்ளலாம் என்ற எண்ணம் ஏற்பட்டது .

இரவு எடுத்த முடிவிலிருந்து விடிகாலையில் மாறி விடுகிறார். சோம்பலில் விழுந்து விடுகிறார்.

அம்பத்தூர் நண்பரால் நிறைவேறும் காரியம் வெறுமையாகி விட்டது . ஏமாளியாக மாறிவிட்டாலும், காரியத்தில் கோட்டை விட்டு விட்டார்.

இதே நிலை நீடிக்கும் போது, எல்லா விடுதல்களுக்கும் சமாதானமும், குற்றங்களுக்கு நியாயத்தையும் சொல்கின்ற கட்டாய நிலைக்கு தள்ளப்படுவார்கள்.

சோம்பலை வளர்த்துக் கொண்டவர்கள் வாழ்க்கையில் தோல்விகளையே சந்திப்பார்கள்.

சோம்பலைத் தவிர்த்து சுறுசுறுப்புடன் இருங்கள். வெற்றிகள் உங்கள் வீட்டுக் கதவை வரிசையில் நின்று கொண்டு தட்டும்.

குரு ராதாகிருஷ்ணன்

இடமறிந்து பேச வேண்டும்

எங்கு எப்படி பேச வேண்டும் என்பதைப் பலர் அறியாது இருக்கின்றனர்.

சூழ்நிலைக்கு ஏற்ப நம்ம பேச்சு அமைதல் வேண்டும் . பேச்சுத்திறன் மதிப்பை உயர்த்தும்.

நண்பரின் மகள் திருமணத்துக்குச் சென்றேன்.

மங்கல நாண் கட்டுவதற்கு முன்னால் நடைபெறும் சடங்குகளை நடத்திக் கொண்டிருந்தனர்.

திருமண மண்டபத்தில் கூட்டம் அதிகமாக இருந்தன.

கூட்டத்தின் மத்தியில் ஒருவர் உரையாடிக் கொண்டிருந்தார். அவரைச் சுற்றி நிறையப் பேர் உட்கார்ந்து கவனித்தனர்.

சுவாரசியமாக ஏதோ பேசப்படுகிறது என எண்ணிக் கொண்டு நானும் அங்கு சென்றமர்ந்தேன்.

டயானா, இளவரசர் சார்லஸ்ஸின் பாலியல் விவகாரங்கள் தான் அவரால் பேசப்பட்டன.

ஆறு நபர்களுடன் பாலியல் தொடர்பு வைத்துக் கொண்ட இளவரசி டயானா, ஏழாவதாக டோடி பயஸின் காதலைப் பற்றி விரிவாகப் பேசிக் கொண்டே போனார்.

இங்கு இப்படி நடக்குமா ? அம்மாதிரியான பெண் கொலை செய்யப்படுவாள் அல்லது தாலியைப் பறித்துத் தாய் வீட்டுக்கு அனுப்பி விடுவார்கள். வாழும்வரை அவள் வாழாவெட்டியாகத் தான் இருப்பாள்.

பிரபல தமிழ் நடிகர் மனைவியை விவாகரத்து செய்து விட்டு கவர்ச்சி நடிகையுடன் சுற்றுவதைப் பேசினார். கூடியிருந்தவர்களுக்கு அவர் கூறும் செய்திகள் சுவாரசியமாகத் தெரிவது போல் தோற்றம் நிலவின.

நான் வேதனைப்பட்டேன். திருமண வீட்டில் பேசும் பேச்சுக்களா இவை ? நாவடக்கம் பற்றி நிறைய தெரிந்து வைத்திருப்பவர்கள் இவ்வாறு பேச மாட்டார்கள்.

தாலி அறுப்பும் , விவாகரத்தும் அந்த வேளையில் தேவை தானா ?

அதே போன்று சாவு வீட்டில் அமர்ந்து கொண்டு தன் வீரப்பிரதாபங்களைச் சொல்பவரும் இருக்கிறார்கள். அவ்வீட்டாரின் துக்கத்தில் பங்கேதில் பங்கேற்று அஞ்சலி தெரிவிக்கும் இடத்தில் ஏன் வாய்ச்சவடால் ?

அவரை மெளனம் ஆக இருக்கச் சொல்பவர்கள் அரிது . மீறிக் கேட்டுக் கொண்டால், ஆமா ! செத்துப் போனவர் திரும்பியா வரப் போகிறார் ? அவருக்கு வேண்டியவர்கள் எல்லோருமே அவர் பின்னாலே சென்று விடுவார்களா ! என மறுமொழி கூறுவார்.

இருவரும் இடமறிந்து பேச இயலாதவர்கள்.

சமூகத்தில் நம் மதிப்பு உயர வேண்டும் என எண்ணுபவர்கள் ; சமுதாயத்தில் பெயர் பெற வேண்டுமென்று நினைப்பவர்கள் இடம் , காலம் அறிந்து பேச வேண்டும்.

தெரியாவிட்டால், இடமறிந்து பேசுபவர்களைக் கவனித்து தங்களைத் திருத்திக் கொள்ள வேண்டும் .

குரு ராதாகிருஷ்ணன்

அணுகுமுறையில் இங்கிதம்

நம்முடைய விஷயம் ஒருவரால் கவனிக்கப்பட்டு முடிய வேண்டும் என்ற நிலை.
அவரை நேரில் சந்தித்து பக்குவமாகத் தெரிவிக்க வேண்டுமென்று நினைக்கிறோம்.

எதிர்பாராத விதத்தில் அடுத்த நாள் அவரை வேறு நண்பர் வீட்டு விசேடத்தில் சந்திக்கிறோம்.

அப்போது நம் விஷயத்தைக் கூறிவிட மனம் விழைகிறது. அது உகந்த சமயமல்ல என்பதை எண்ணிப் பார்க்க வேண்டும்.

அந்த இடத்தில் பேசி அவரைத் தர்ம சங்கடத்தில் ஆழ்த்தி விடுவது கூடாது.
நம் விஷயத்தை அக்கறையோடு அறிந்து கொள்ள வேண்டும் என்கிற மனநிலை அவருக்கு இருக்காது .

மேலும் அங்கு விரிவாகச் சொல்லிவிட முடியாத படி மற்றவர்களின் தலையீடுகள் நிறைய இருக்கும்.

அவரை நம் வீட்டுக்கு அழைத்து விருந்து வைத்து விஷயத்தைச் சொல்லிவிடவும் எண்ணாதீர்கள்.

இரை வைத்துப் பிடிக்கும் நபராக நம் மீது தப்புக் கணக்குப் போட வைத்து விடும்.
பின் எந்த வகையில் விஷயத்தை சொல்ல வேண்டும்.

வழிகள் உண்டு. சரியான வேளை வர வேண்டும்.
அவர் வேண்டியவராக அல்லது அறியாதவராக இருப்பினும் எப்போது அணுக வேண்டும் என்பதை முதலில் அறிந்து கொள்ளுங்கள்.

ஒய்வாக இருக்கும் நேரத்தை வேண்டியவர்களிடமிருந்து கேட்டுத் தெரிந்து கொள்ளுங்கள்.

தொலைபேசி இருந்தால் சந்திக்கும் நேரம் பற்றிச் சொல்லுங்கள்.

அப்போது தான் அவரது மனநிலையை தெளிவாக வைத்துக் கொள்வார்.

நம் விஷயத்தின் முக்கியத்துவம் , விவரங்கள் இவைகளோடு சந்தியுங்கள். சுருக்கமாகச் சொல்லி முடிவாக நீங்கள் அதனால் அடையப் போகின்ற் நன்மையைத் தெளிவுபடுத்துங்கள்.

சந்தித்துப் பேசிய பின் பாருங்களேன்.

அவர் உதவும் நோக்கோடு மடமடவென்று நடவடிக்கைகளை எடுப்பார். பலன் ஏற்படும் வரையில் ஒய மாட்டார்.

அணுகும் முறையில் இங்கிதம் காண்பிப்பவர்களுக்கு காரியங்கள் துரித கதியில் நடந்து முடிந்து விடும்.

சொன்னவரும், கேட்டவரும் நிம்மதி பெறுவர் என்பதை சொல்லவும் வேண்டுமோ !

குரு ராதாகிருஷ்ணன்